www.kvinnheringen.no: Tina Abdulla (14) frå Husnes er handplukka til å få vera med Bergensklubben Arna Bjørnar til Dallas, Texas.
Der skal ho og jenteakademiet til Arna Bjørnar delta i Dallas International
Girl Cup og møta dei beste jentelaga frå USA, Canada og Europa.
– Eg er med på krinslaget i Hordaland, og reiser til Bergen kvar tysdag for å
trena. Det var slik eg vart plukka ut, fortel Tina.
– Tina er ein kjapp og flink fotballspelar som er brukt som spiss på
krinslaget. Vi trur ho kan gjera ein god jobb for laget under cupen i
Dallas, seier sportskoordinator i Arna Bjørnar, Sigmund Tunes.
Fredag 30. mars reiser Tina og dei andre jentene frå Arna Bjørnar ned til eit
ti dagars opphald i Dallas der dei skal bu hos vertsfamiliar frå dei lokale
laga. I tillegg til trening og å spela kampar får dei oppleva mykje
spennande.
– Eg synest det er ein fantastisk sjanse å få og eg vart veldig overraska over
å få vera med på laget til Arna Bjørnar. Eg hadde eigentleg lyst å reisa på
språkreise til USA, men så vart det for dyrt. No får eg reisa likevel, og eg
gler meg utruleg mykje, seier Tina oppglødd.
