www.kvinnheringen.no: Denne helga deltek Eirik Fykse (19) frå Husnes i skikonkurransen Norwegian Open.
Eirik driv med såkalla «jibbing» eller «free skiing», som er ei undergrein av freestyle skikøyring. Laurdag og søndag deltek han i første runde på twin tip-cupen Norwegian Open i Geilo.
Eirik skal delta i to konkurransar i juniorklassen med utøvarar frå 16 til 19 år; slopestyle på laurdag og bigair på søndag.
– Slopestyle er ein grein som no faktisk skal vera med i vinter-OL i Sotsji, Russland, i 2014 for første gong. I denne greina må triksa gå i eitt, og du får berre to «run» altså løp, der den beste poengsummen av dei to tel mest. I Big Air hoppar du på hopp og får tre run, der det beste tel mest, forklarar Eirik.
Det er første gong han deltek i konkurransen.
– Eg har ikkje konkurrert så mykje tidlegare, derfor kan eg ikkje ha så alt for høge forventningar. I denne første runden samlar ein poeng som ein tek med seg vidare i cupen, førsteplass gir 100 poeng medan 31. plass og nedover gir eitt poeng. Norwegian Open kan vera ei moglegheit til å bli teke ut til landslaget og koma seg til VM og OL. Landslaget er ikkje gjennom skiforbundet, men to klubbar i Oslo har samarbeid med Olympiatoppen, seier Eirik.
Les om Eirik sine resultat i Norwegian Open i onsdagsavisa neste veke.
