www.kvinnheringen.no: Etter det skuffande bortetapet laurdag klarte Kvinnherad å snu trenden. Søndag vann dei borte mot Askøy, men ikkje heilt problemfritt.
Søndag møtte handballdamene til KHK Askøy i bortekamp, og ville reisa seg
etter det tunge tapet mot Sotra dagen før.Etter ei jamn opning der laga
følgde kvarandre tett dei første ti minuttane overtok KHK meir og meir og
fór ifrå.
– Det meste fungerte, både framover og bakover. Vi hadde ein fin rytme i
angrep og eit aggressivt forsvar. Då vi gjekk i garderoben til pause leia vi
med seks mål, og vart samde om å halda fram slik, fortel trenar Arne
Lindeflaten.
Men slik blei det ikkje. I andre omgang rakna det litt for Kvinnherad.
– Vi hadde utruleg sløvt forsvarsspel og sleppte Askøy alt for godt inn i
kampen. Dei fekk scora som dei ville, og midtvegs i omgangen låg dei berre
eitt mål bak oss. Då tok vi ein timeout og måtte ha full skjerping. Det
lukkast vi delvis med. Askøy hang med heilt til det var fem-seks minutt att
av kampen.
Det vart siger til KHK, men Lindeflaten ser for seg ein tøff periode for
handballdamene framover.
– Det var godt å få reisa seg etter Sotratapet, men vi slit når vi har så
mange spelarar ute med skade. Det vil bli tungt framover, seier han.
