www.kvinnheringen.no: På Uskedalen skule er romma så kalde at elevar og tilsette må ha på seg ytterklede innandørs.
– Eg frys sjølv om eg har boblejakke på meg, seier elev Frida Nybakk (12) på
7. trinnet.
– Eg har fleecejakke og varme klede under jakka, og no sit eg med ei ekstra
jakke oppå beina for ikkje å frysa, fortel elev Karen Pedersen Brede (12).
For kaldt til å arbeida
Torsdag var det uhaldbare høve ved Uskedalen skule. Det er spesielt i
klasseromma, rektor sitt kontor og arbeidsrommet til lærarane i den eldste
delen av skulebygget det blir iskaldt. Kulda er ikkje eit problem der
småskulen held til i den nye delen av skulen som vart pussa opp for rundt ti
år sidan.
– Vi har hatt det kaldt lenge, men når vinden blæs slik som no blir det ekstra
gale sjølv om alle omnar er på. Vinden blæs liksom rett gjennom, vi har
ikkje lufting her og det er dårleg isolert. Vi tilsette klarar ikkje å sitja
på arbeidsrommet og jobba, og då vi prøvde å setja på ekstra varmeomnar fór
straumen, fortel verneombod Hilde Bringedal.
Kontaktlærar for 7. trinn, Aud Jorunn Seim, seier den låge temperaturen går ut
over undervisninga.
– Undervisninga blir amputert når elevane sit og frys og ikkje klarar å
konsentrera seg. Det er meir fokus på kor kaldt det er enn kva fag vi held
på med. Slik det er no får elevane vera inne i friminutta, dei kan ikkje gå
ut når dei har sete med ytterklede inne. Det er verkeleg ikkje kjekt å komma
på jobb og skulen når det er slik, seier ho.
Renovering snarast
Verksemdsleiar ved Uskedalen skule, Marie Elisabeth Kaldestad, har no
informert både hovudverneombod og kommunalsjef Asbjørn Skår om situasjonen.
– Retningslinjene seier at temperaturen i klasseromma skal vera mellom 19 og
26 grader. I dag, torsdag, har vaktmeister frå Teknisk etat målt i to
klasserom, og der var temperaturen berre 19 og 17 grader. Arbeidsrommet til
lærarane hadde 13 grader. Vi må jo heile tida vurdera om det er forsvarleg å
ha det slik, og det er det på kort sikt dersom elevane kan ha meir klede på
seg og vi skrur opp varmen på omnane. Men dette kan ikkje halda fram lenge.
Renoveringsplanen ligg klar, det er sett av fem millionar kroner, og planen
er at arbeidet skal byrja i løpet av 2012. Dette arbeidet må settast i verk
snarast, presiserer verksemdsleiaren.
