www.kvinnheringen.no: Bjellandsbrua skal i haust reparerast for 2,8 millionar kroner.
I tillegg kjem kostnader til byggjeleiing, utbetring av el-anlegg, hydraulikk og dessutan meirverdiavgift. Brua er av den sjeldne sorten som kan vippa opp ein del av brudekket (nærast Bjelland) dersom store fartøy eller seglbåtar skal passera. Vippemekanismen er i bruk år om anna.
Reparasjonsarbeidet vil føra til at brua vert stengt for biltrafikk i om lag tre veker, medan gåande skal kunna passera.
– Eksakt dato for oppstart er ikkje heilt settla, med det blir like etter at kystdagane på Sunde er avvikla, opplyser senioringeniør i Statens vegvesen, Gunnar Einar Djuve.
Det stadig smuldrande asfaltdekket er lagt på treverk. Asfalten skal erstattast med stålplater. Vidare skal stål-brukaret sandblåsast og malast.
– Det er på tide med ein reparasjon, vedgår Gunnar Einar Djuve.
Reparasjonen vil føra til redusert seglingshøgd og vegvesenet har i den samanhengen kontakt med båtlaget. Etter reparasjonen skal brua ifølgje vegvesenet overtakast av kommunen som alt har overtatt vegen som går over brua.
