www.kvinnheringen.no: Noreq AS gjer det godt om dagen, og har skrive kontraktar til ein verdi av 22 millionar.
Noreq AS skriv om gode tal i slutten av august i ei pressemelding. Selskapet har inngått kontrakt med verdas største skipsverft, Hyundai i Korea, som har bestilt fire livbåtar og fire sett med rigg-davitar. Noreq er det einaste selskapet som kan tilby denne typen davitar, og for selskapet er dette deira første ordre til Korea.
– For oss er dette verkeleg stort, og med ein fot innanfor marknaden i Korea, så har vi stor tru på at det kjem fleire ordrar i dette området. Salet viser at vårt nye davitsystem har vore ei korrekt satsing, seier administrerande direktør Styrk Bekkenes i pressemeldinga.
I tillegg til kontrakten med Hyundai skreiv Noreq denne veka under kontraktar i samband med Fred Olsen sitt heilt nye «Wind Carrier»-prosjekt. Her skal Noreq levera livbåtar, to NPD 10500 davits og ein fast rescuebåt, til to skip.
Dei to nemnde ordrane er dei største til Noreq den siste tida, i tillegg er det gjort avtalar dei siste vekene med leveringar til Australia, Holland, Malaysia og Singapore.
– Vi har aldri før inngått så mange ordrar i løpet av så kort tid, seier ein nøgd Styrk Bekkenes.
